.jpeg)
SURAT BALEBAT KEUR KI
SUNDA
Kenging : Undang Sumargana
Milang taun lir milang kamelang
Melang ka Ki Sunda
sieun leugit tatapakan
Hariwang ku
kalangkang nu datang ngalelewaan
Sunda nanjeur
sunda nanjung
Sunda midang mangka langgeng
Digjaya ngudag kawaluyaan
Ngababakan di sarakan panghuripan
Wilujeng Milangkala Dangiang Sunda Pakidulan
Kitu ceuk soara
bari ngawurkeun saruntuyan imut
Nu nyumput
satukangeun mega
Aya sora
ngadangding ngajakan eling
Kawih asri
ngahariring, ngentring na langit bihari
Karisi teu lantis
ku girimis ngepris
Risi hirup kasaput
ku haseup dayeuh
nu kotor cakeutreuk hideung
jati ........ kasili
........ ku junti
Duh ......palias......... teuing
Gentreng kacapi
kiwari mimiti pamit
Tepak kendang narungtutan laleungitan
Mun wasa nyarita
kuring rek nitip asih
Na gerelik suling
nembang kamelang
Sangkan Ki sunda
lilir ngulisik
Bulan nu
ngangkleung balayar di langit Bandung
Widadari
turun langit.......
ngalayang
lebah tanjakkan lembang
Nanggeuy
deudeuh
mawa
kanyaah Ki Sunda tong kajongjonan
ngungkab carita
mangsa lawas
Bumi endeur
Tatar sunda
lir oyag ku lini badag
Samagaha
sarengenge
Totonden Ki Sunda
nandang tunggara
Prabu maharaja
lambang kasatriaan
Lambang
kaprawiraan
Jujuluk prabu
wangi
Cita resmi nu tega
ngemasing pati
Ngajungjung ajen
diri wanoja anu satia
Bumela ka lemah
cai
Prabu
Siliwangi saterusna katelahna
Jujuluk ka raja Sunda
Nu toweksa ka
rakyatna
Hayu Ki Sunda
.....
Geura lugay nguniang pinuh harepan
Wawangi siliwangi jadi bukti
Ku sunda pernah
digjaya
Wastu kencana di karaton Sura wisesa
Pangaruhna
ngabuana
Kawali nu jadi
saksi
Gedurkeun deui
obor Bandung Lautan api
Na dada arandika
Dada Ki sunda nu
boga tekad rohaka
Ki jalak harupat
bukti kuat
yen Ki sunda teu
jejerih sieun ku pati
Sunda midang
,sunda nunjang ,sunda nanjung
Beungkeut pageuh
ku tali silaturahmi
Silih asah-silih
asih sili asuh
jadikeun tatapakan nu nyoko
na kailhlasan
(Tasik Pakidulan 201)
DI
KARANG TAWULAN
Kenging
: Undang Sumargana
Di Karang Tawulan....
Bulan pias katambias
Sabab angin nyangkere di guha simpe
Basa ombak nembrag karang
Aya carita
ngalanglang pinuh harepan
Di Karang Tawulan......
Cinta akang nu lawas teu daek laas
Nu dipungkas nitis tulis
Diri anjeun tinemu
reujeung patina
mangsa nyawa geus tega ninggalkeun raga
Di Karang Tawulan .......
Na pepenclut batu karang
Basa angin lilimbungan
Asih urang enung mepende hate nu simpe
Cinta urang Enung ngarandakah
Ngenagkeun ketug jajantun
(Tasik
Pakidulan, 2016)
NU MANDEG DINA KAKANGEN
Kenging : Undang Sumargana
Basa bulan nyangsaya na mega bodas
Bentang muruluk murag jadi kalakay
Kawas angin nu keur kingkin
Mudalkeun kaheman na lalakon lawas.
Nu mandeg na kakangen sapanjang ambekan
Basa ibun tuturubun pasusubuh
Nu nyesa bentang ukur nyengcelak
Samar-samar imut mega mapag beurang
Muka lawang dina ringkang kahariwang
Sabab cinta nu lawas mo deui datang
Tangkal rungkad nangkarak di rajam hujan
Di rabut ku angin ribut
Kasamber ku gelap anu susumbar
Na teteger hate aya dumeling ngageuing
Diri kakara sadar teu perlu aral subaha
Horeng diri Kudu sadrah tumarima
Geus mulang anjeun geus mulang
Nuju alam panghisab di kalanggengan
Ditulis na Simpena peuting
(Tasik
Pakidulan 2016)
SADRAH
Dina sela-sela munajat ka anjeun ya Allah
Kuring nyobaan nyaliksik diri, naratas
raga
Tetela ieu diri perlu panyiram ku
tirtaning rahmat
Tirtaninng rahmat ti anjeun dzat nu Maha asih
Ieu raga
geus karahaan ya dzat Illahi Robbi
Lamokot ku dosa jeung tingkah nu teu daek merenah
Perlu di seseuh ieu raga ku kalimah
toyibah sugan murag kokotorna
Dina sela sela munajat ka Anjeun ya Allah
dzat nu Maha bijaksana
Kuring sumerah tina lampah sasar ngagugu
pangajak syetan
Mangga tibankeun hukuman Anjeun di dunya
dzat nu Maha adil
Sabab kuring yakin moal kuat nandang siksa
di akherat
ieu diri nu ngawujud jeung raga nu masih
nyawaan
Rumasa
ngacaprak loba milampah angkara
Tapi masih miharep pangampunan anjeun
Ya Allah dzat nu Mahaasih...........
Sabab simkuring yakin lawang tobat masih
muka
Ti Anjeun Illahi Robbi ratuning kaadilan.
Ditulis dina kamer pangrereban
Nunggu waktu subuh sabada tahajud
Tasik Pakidulan 2016
PASRAH
Kuring pasrah kana Kawasa Anjeun Ya Robbi
Karasa hirup salila ieu loba nincak na
kubangan dosa
Dina mangsa janari leutilk Ya Dzat Illahi
robbi
Kuring masrahkeun ieu raga anu masih
diancikan nyawa
Kasarakahan, kaangkuhan nu salila ieu
kadang ngancik na diri
Geus nyasaak roh suci ngancik na
satukangeun raga
Ikrar kuring ka anjeun Ya Allah
Ashadu Allaaa Illaaa Ha illaloh
Ikrar kuring Ka anjeun Yaaa Nabiyuloh
Wa ashadu Annaaa Muhammadarosuululoh
Tapi rumasa Ya Allah Dzat nu maha agung
Hirup mineng papalingpang jeung pituduh
anjeun
Hirup teu napak dina conto-conto anjeung
Yaa Rosululloh
Na mangsa peuting keur simpe Yaa Allah
Karasa diri mungguh taya ajen pangawasa
Rahmat jeung karunia nu geus diawurkeun ku
anjeun
Ngan ukur dipake papaes ku simkuring
laku awuntah sarakah pinuh rasa adigung
Ya Allah kuring masrahkeun ieu raga
Bisi rek dipisahkeun jeung nyawa
Sabab Anjeun anu miboga
Kuring ngan ukur wayang-wayang nu keur
ngalalakon
Sadaya aya dina pangawasa anjeun
Ya Robbi Dzat nu maharahman
Lamun temah kahadean sim kuring kudu nebus
rahmat anjeun
Jauh kana cumpon, tapi naha diri lumaku
sok humayua
Padahal hirup ngan satutup umur nu di
watesanan ku rahmat anjeun
Rumasa kadang hirup sok ngagulkeun nu
dipasihkeun ku anjeun
Lain teu ngadangu kaagungan ajeun nu di
contoan ku Rosulullah
Tapi mindeng diri kabengbat ku panggoda
syetan
Kuring munajat Ka Anjeun Ya Allah...
Dina mangsa ngulisikna angin peuting
Na mangsa rereuhna hate nu geus dipepene
ku kadunyaan
Galura rasa nu salila ieu aya na
angkleungan kahirupan samar
Kiwari asa katiir ku pagaliwotana
kahirupan nu pinuh ku dosa
Lamun temah lain ku sipat rohman rohim
Anjeun Ya Allah
Kuring tangtu kaasup mahluk cilaka
Nu wangkelang kana parentah anjeun
Ditulis na mangsa poe ngagayuh ka subuh
Tasik Pakidulan 2016
Posting Komentar untuk "SURAT BALEBAT KEUR KI SUNDA "